Алматы

20 қыркүйекте, Қала күні Алматыда алғашқы гастрономиялық көше ашылады. Ол Масанчи көшесінің Сәтбаев даңғылынан Абай даңғылына дейінгі бөлігінде орналасқан.

Масанчи көшесінде гастрономиялық кеңістік құру жобасы Алматыда мамандандырылған гастрономиялық көшелер желісін қалыптастыру аясында жүзеге асырылып отыр. Жоба қала экономикасын, туризмді, шағын және орта бизнесті дамытуға, сондай-ақ заманауи қоғамдық кеңістіктер құруға бағытталған.

Гастрономиялық көшелер тұжырымдамасы гастрономия, мәдениет, кәсіпкерлік пен көркейтуді біртұтас қалалық ортада тоғыстыратын халықаралық тәжірибеге негізделген.

Мұндай кеңістіктер жергілікті бизнестің дамуына серпін беріп, көшелердің тартымдылығын арттырады әрі тұрғындардың демалып, уақыт өткізуіне және қарым-қатынас жасауына қолайлы жағдай қалыптастырады.

Жоба аумақтарды бірыңғай сәулеттік тәсіл негізінде кешенді жаңғыртуды және гастрономиялық инфрақұрылымды дамытуды көздейді. Нысандардың кемінде 60%-ын қоғамдық тамақтану орындары, ал 40%-ға дейінгі бөлігінде гастрономиялық көше тұжырымдамасына сай өзге де кәсіпкерлік нысандар – гүл дүкендері, қолөнер шеберханалары, кітап дүкендері, галереялар және басқа да орындар болады.

Масанчи көшесі осы бағыт аясында жүзеге асырылған алғашқы кеңістік болмақ. Ұзындығы 413 метр аумақта жартылай жүргіншілер аймағы, кеңейтілген тротуарлар, көгалдандырылған аумақтар, веложол және қоғамдық тамақтану орындарының жазғы алаңдары бар заманауи қалалық орта қалыптастырылды.

Көркейту жұмыстары аясында жол жабыны мен қалалық инфрақұрылым элементтері жаңартылып, кедергісіз орта жасалды. Жаңа жарықтандыру жүйесі орнатылып, орындықтар мен қоқыс жәшіктері қойылды. Аумақ жасыл желекпен, арт-нысандармен және шағын сәулет нысандарымен толықтырылды. Сонымен қатар ғимараттар «қасбеттен қасбетке дейін» қағидаты бойынша қайта жаңғыртылды.

Масанчи көшесінің тұжырымдамасы музыка мен қалалық мәдениетке басымдық беретін жастар гастрономиялық көшесін жасауды көздейді. Оның тақырыптық бағыттарының бірі аты аңызға айналған «Дос-Мұқасан» тобына арналады. Топ мүшелері кезінде Қазақ политехникалық институтының студенттері болған.

Көше бойында барлығы 26 нысан орналасқан. Оның 16-сы – жұмыс істеп тұрған және ашылуы жоспарланған қоғамдық тамақтану орындары. Олардың қатарында Bal, Tary, The Point және басқа да мейрамханалар бар. Қазіргі уақытта бірқатар нысанда жөндеу жұмыстары жүргізіліп жатыр. Жұмыстар аяқталғаннан кейін олар кезең-кезеңімен ашылады.

Алматыда гастрономиялық көшелер желісін дамыту жұмыстары алдағы уақытта да жалғасады. Бұл бағыт қоғамдық тамақтану орындарын, шағын және орта бизнесті және заманауи қоғамдық кеңістіктерді бір ортаға біріктіруді көздейді.

Алматыда LRT жобасын жүзеге асыру аясында Төле би көшесінің бірқатар учаскесінде көлік қозғалысы уақытша шектеледі.

Атап айтқанда, 12 және 13 қыркүйек күндері сағат 23:00-ден 08:00-ге дейін Масанчи көшесінен Байтұрсынұлы көшесіне дейінгі және Наурызбай батыр көшесінен Желтоқсан көшесіне дейінгі аралықта көлік қозғалысы жабылады.

Жұмыстардың орындалу мерзімі технологиялық үдерістің ерекшеліктеріне байланысты өзгеруі мүмкін. Жөндеу жүргізілетін учаскелерде ескерту белгілері орнатылады. Жол жүру бағытыңызды алдын ала жоспарлауды сұраймыз.

Еске саламыз, көлік қозғалысына енгізілетін шектеулер туралы барлық ақпарат @AlmatyJoly Telegram арнасында, әкімдіктің әлеуметтік желілерінде, сондай-ақ 2GIS және «Яндекс карталары» сервистерінде жарияланады.

Абай даңғылының бір бөлігінде орташа жөндеу жұмыстарының жүргізілуіне байланысты көлік қозғалысы уақытша шектеледі.

13 қыркүйек сағат 06:00-ден 14 қыркүйек сағат 06:00-ге дейін Саин көшесінен Б. Момышұлы көшесіне дейінгі аралықта автокөлік қозғалысы жабылады.

Жұмыс мерзімі ауа райы жағдайы мен технологиялық үдеріске байланысты өзгеруі мүмкін. Жөндеу жұмыстары жүргізілетін учаскеде ескерту белгілері орнатылады. Жол қозғалысына қатысушылардан бағытын алдын ала жоспарлауды сұраймыз.

Еске салайық, жол қозғалысына енгізілетін шектеулер туралы барлық ақпарат @AlmatyJoly Telegram арнасында, әкімдіктің әлеуметтік желілерінде, сондай-ақ 2GIS және «Яндекс карталары» сервистерінде жарияланады.

Алматының Медеу ауданында 18 қыркүйекке дейін Олимпийская көшесінің бір бөлігінде көлік қозғалысы уақытша шектелді. Бұл шаралар 220 кВ кабельдік электр беру желісінде апаттық-қалпына келтіру жұмыстарын жүргізуге байланысты енгізілді.

Жұмыс Олимпийская көшесіндегі №4А үйдің маңында жүргізіліп жатыр. Жұмыс кезеңінде Тышқанбаев көшесінен Байқоңыр көшесіне дейінгі аралық жабылды.

Жөндеу жұмыстарын жүргізу қажеттілігі №2363 220 кВ электр беру желісінің кабельдік учаскесінің зақымдануына байланысты туындады. Соның салдарынан қазіргі уақытта энергия жүйесі мәжбүрлі түрде ажыратылған схема бойынша жұмыс істеп тұр. Бұл Алматы қаласы мен Алматы агломерациясын электрмен жабдықтау сенімділігін төмендетеді.

Қалыпты жұмыс схемасын қалпына келтіру үшін «Алатау Жарық Компаниясы» АҚ мамандарына жолдың жүріс бөлігінің астында тікелей апаттық жұмыс жүргізу қажет.

Жұмыс қауіпсіздік талабын сақтай отырып, тәулік бойы жүргізіліп жатыр. Жұмыс аяқталғаннан кейін бұзылған көріктендіруді қалпына келтіру жоспарланған.

Қала тұрғындары мен қонақтарынан көлік қозғалысына енгізілген уақытша шектеуді ескеріп, бағытын алдын ала жоспарлау сұралады.